ភ្នំពេញ៖ រដ្ឋបាលរាជធានីភ្នំពេញបានស្នើឱ្យពលរដ្ឋបញ្ចៀសចរាចរយានយន្តគ្រប់ប្រភេទជាបណ្តោះអាសន្ននៅថ្ងៃសុក្រ ទី១៤ ខែកក្កដា ឆ្នាំ២០២៣ ចាប់ពីព្រឹកព្រលឹមម៉ោង៥តទៅរហូតដល់ចប់កម្មវិធីសម្ពោធវិមានរំលឹកដល់អ្នកដែលទទួលអនិច្ចកម្មក្នុងសង្គ្រាមលោកលើកទី១ ពីឆ្នាំ១៩១៤ ដល់ឆ្នាំ១៩១៨ «រូបពីរ» នៅសួនច្បារមុខស្ថានទូតបារាំង ស្ថិតក្នុងសង្កាត់ ស្រះចក ខណ្ឌដូនពេញ រាជធានីភ្នំពេញ។
កម្មវិធីសម្ពោធវិមានរំលឹកដល់អ្នកដែលទទួលអនិច្ចកម្មក្នុងសង្គ្រាមលោកលើកទី១ ពីឆ្នាំ១៩១៤ ដល់ឆ្នាំ១៩១៨ «រូបពីរ» នេះនឹងប្រារព្ធឡើងក្រោមអធិបតីភាពនាយករដ្ឋមន្ត្រីកម្ពុជា សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
រដ្ឋបាលរាជធានីភ្នំពេញ បិទកំណាត់មហាវិថីព្រះមុនីវង្សបណ្តោះអាសន្ននៅជុំវិញកន្លែងប្រារព្ធពិធីចាប់ពីផ្លូវលេខ៨៤ ដល់រង្វង់មូលកាំភ្លើងកួចកាណុង កំណាត់ផ្លូវលេខ៤៧ ចាប់ពីផ្លូវលេខខ៨៤ ដល់រង្វង់មូលកាំភ្លើងកួចកាណុង ក៏ដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀប រៀបរយសាធារណៈ ព្រមទាំងបញ្ចៀសបាននូវការកកស្ទះចរាចរណ៍។
រដ្ឋបាលរាជធានីភ្នំពេញ អំពាវនាវពលរដ្ឋបើអាច សូមវាងទៅផ្លូវផ្សេងដើម្បីបញ្ចៀសការកកស្ទះចរាចរណ៍ កម្មវិធីចបនឹងបើកផ្លូវឱ្យចរាចរជាធម្មតាវិញហើយ។
សូមរំលឹកបន្តិចថា កាលពីនាយករដ្ឋមន្ត្រីកម្ពុជា សម្តេចតេជោ ហ៊ុន សែន អញ្ជើញទៅជួបលោកប្រធានាធិបតីបារាំង ម៉ានុយអ៊ែល ម៉ាក្រុង កាលពីខែឆ្នូ ឆ្នាំ២០២២ កន្លងមក សម្តេចបានបញ្ជាក់ពីគោលបំណងសាងសង់ឡើងវិញស្តូបរំលឹកដល់វិញ្ញាណក្ខន្ធយុទ្ធជនពលីកម្ពុជា និងបារាំងក្នុងសម័យសង្គ្រាមលោកលើកទី១ ក្រោយពីស្តូបនេះត្រូវបានខ្មែរក្រហមបំផ្លាញចោលក្នុងឆ្នាំ១៩៧៧ ខណៈស្តូបនេះសាងសង់ដំបូង១៩២៥។
ស្តូបរំលឹកដល់វិញ្ញាណក្ខន្ធយុទ្ធជនពលីកម្ពុជា និងបារាំងក្នុងសម័យសង្គ្រាមលោកលើកទី១ ចាប់ផ្តើមសាងសង់ឡើងវិញនៅថ្ងៃទី២៥ ខែមករា ឆ្នាំ២០២៣ ដោយក្រសួងរៀបចំដែនដី នគរូបនីយកម្ម និងសំណង់៕
